सन् २००९ मा पहिलो पटक अमेरिकी राष्ट्रपति निर्वाचित भएका ओबामा सन् २०१३ मा दोस्रो पटक राष्ट्रपति निर्वाचित भए । डेमोक्र्याटिक पार्टीका तर्फबाट ओबामाले दुई कार्यकाल अमेरिकाको शासन चलाउँदा नेपालमा पाँचजना कम्युनिस्ट, एकजना डेमोक्र्याट र एकजना पूर्वप्रधानन्यायाधीशले शासन चलाए ।
अमेरिकी संविधानअनुसार त्यहाँ प्रत्येक चार वर्षमा सरकार परितर्वन हुन्छ । २०७२ असोजमा जारी भएको संविधानअनुसार नेपालमा बहुमतको सरकार पाँच वर्ष चलाउने व्यवस्था भएपछि यसअघिको ट्रेन हेर्दा प्रत्येक नौ महिना सरकार परिवर्तन हुने गरेको छ ।
ओबामाले सन् २००९ जनवरी २० देखि सन् २०१७ जनवरी २० सम्म शासन चलाएर शनिबार (हिजो) ह्वाइट हाउस छोड्दासम्म नेपालले सात प्रधानमन्त्री पायो ।
प्रचण्ड र ओबामाको अनौठो संयोग
ओबामा कार्यकाल सुरु हुँदा वर्तमान प्रधानमन्त्री पुष्पकमल दाहाल प्रचण्ड प्रधानमन्त्री थिए । र अनौठो संयोग ओबामाको कार्यकाल सकिँदा पनि प्रचण्ड नै नेपालका प्रधानमन्त्री छन् ।
नेकपा माओवादी केन्द्रका अध्यक्षसमेत रहेका प्रचण्ड पहिलो पटक २०६५ भदौ २ गते प्रधानमन्त्रीमा निर्वाचित भएका थिए । उनको सरकार २०६६ वैशाख २१ ढल्यो । उनले आठ महिना शासन गरे ।
प्रचण्डपछि नेकपा एमालेका माधवकुमार नेपाल प्रधानमन्त्री बने । २०६६ जेठ ११ गते प्रधानमन्त्री बनेका नेपालले करिब २० महिना सरकार चलाए । उनको सरकार २०६७ माघ २२ गते ढलेको थियो ।
ओबामा कार्यकालका एक मात्रै डेमोक्र्याट प्रधानमन्त्री हुन् सुशील कोइराला । नेपाली कांग्रेसका तत्कालीन सभापति कोइरालाले २० महिना सरकार चलाए ।
उनी प्रधानमन्त्री भएका बेला संविधानसभाले संविधान जारी गर्न सफल भएको थियो । २०७० माघमा प्रधानमन्त्री बनेका कोइरालाले २०७२ असोज ३ गते संविधान जारी भएपछि पदबाट राजीनामा दिएका थिए ।
ओबामा कार्यकालका अन्तिम अर्थात् सातौं प्रधानमन्त्री हुन्, पुष्पकमल दाहाल प्रचण्ड । ओबामा कार्यकाल सुरु हुँदा पनि प्रधानमन्त्री रहेका प्रचण्ड दोस्रो पटक २०७३ साउनमा प्रधानमन्त्रीमा निर्वाचित भएका हुन् । यसरी अमेरिकामा ओबामाले आठ वर्ष शासन गर्दा नेपालमा सात प्रधानमन्त्री फेरिए ।
ओबामापछि अमेरिकी शासनसत्ताको चाबी डोनाल्ड ट्रम्पको हातमा पुगेको छ भने नेपालमा फेरि सरकार परिवर्तन हुने चर्चा सुरु भएको छ ।
Post a Comment